Dintlha tsa kgolagano
Se o tshwanetseng go se itse le ditshwanelo tsa gago fa o tsaya pholisi ya thuso ya phitlho
BOTO YA DITIRELO TSA MADI
Lefapha la Thuto la Badirisi
Se o tshwanetseng go se itse ka ga dipholisi tsa phitlho
Sebopego se se botlhokwa sa PHOLISI nngwe le nngwe ya THUSO YA PHITLHO / PHOLISI E KGOLO ke gore pholisi e tshwanetse go SAENIWA ke setlamo sa inšorense sa paka e telele se se kwadisitsweng. Se, ke go netefatsa fa leloko le netefalediwa ka topotuelo e e mo molaong ka motsi wa tiragalo e e inšorilweng ( loso ).
MONG-PHOLISI / LELOKO le tshwanetse go neelwa SETIFIKETI SA BOTOKOLOLO. Setifikeiti se, se tshwanetse go tlhagisa ka botlalo leina la setlamo sa inšorense (moinšori), karolotuelo e e tshwanetseng go duelwa, dithuso tse di tshwanetseng go duelwa, dithulaganyo tsa topotuelo le tshedimosetso e nngwe e e botlhokwa ka ga pholisi e kgolo. Pholisi e kgolo e tshwanetse go tlhagisa ka botlalo fa setlamo sa ditirelo tsa phitlho kgotsa baemedi ba lona ba sa thapiwa ke setlamo sa inšorense kgotsa moinšori le gore ga se basaeni ba pholisi.
Go botlhokwa gore beng-pholisi ba itse fa ba na le tlhopho ya go ka tsaya dithuso tsa pholisi ka mokgwa thuso ya tirelo ya phitlho kgotsa ka mokgwa wa tuelo ya madi a mo seatleng.
Setifikeiti se tshwanetse go tlhagisetsa Mong-pholisi / Leloko tshedimosetso yotlhe e e tlhokegang go e itse jaaka gore thuso e simolola leng, ke eng se se akareditsweng le gore TSE DI SA AKAREDIWANG ke dife, dipaka tsa tetelo jj.
Ditlhaloso
THUSO YA PHITLHO / PHOLISI E KGOLO
Ke tokomane ya semolao e e rebolwang ke setlamo sa inšorense / moinšori e e tlhagisang dintlha tsa dithuso, dikelo, dikaelo le maemo e bile e na le nomoro ya pholisi, e e tshwanetseng go tlhagelela mo setifikeiting sa gago sa botokololo.
MEKGATLHO YA BOTSALANO
Mokgatlho wa Botsalano ke setheo sa madi se se tlhamiwang ke setlhopha sa batho ba ba nang le ditlhokwa tse di rileng, ba ba abang madi le go boloka mmogo go thusana ka madi malebana le ditlhokwa tse di rileng sekao: phitlho. Thuso ya makisimamo ke R5 000.
Mokgatlho wa Botsalano ga se kgwebo e e dirang poelo, fela poelo nngwe le nngwe e e diriwang go tswa mo dikabong tsa peeletso tsa maloko e kgaoganngwa ke maloko otlhe.
SETIFIKEITI SA BOTOKOLOLO
O tshwanetse go gatelela go amogela setifikeiti se go tlhomamisa fa o le leloko. Setifikeiti se, se tshwanetse go go kaela dintlha tsotlhe tsa pholisi ya gago.
BATSAMAISI / BATSEREGANYI
Se, se kaya setlamo se se letleletsweng ke setlamo sa inšorense / moinšori go dira mo boemong jwa sona go go rekisetsa pholisi.
SETLAMO SA INŠORENSE / MOINŠORI
Ke setlamo sa inšorense sa paka e telele se se kwadisitseng le Boto ya Ditirelo tsa Madi se se amogelang dikarolotuelo tsa gago e bile sena le maikarabelo a go duela dithuso ka motsi wa loso.
MONG-PHOLISI / LELOKO
Se, se kaya wena jaaka leloko le le duelang dikarolotuelo malebana le dithuso tsa batho ba ba tlhophilweng ke wena mo pholising.
DIKAROLOTUELO
Ke madi a o a duelang kwa setlamong sa inšorense go ya ka Pholisi e Kgolo.
Ke motho yo o ikemetseng yo wena jaaka leloko o ka ikgolaganyang le ena fa o sa itumelele karabo ya setlamo sa inšorense. Dintlha tsa gagwe tsa kgolagano di tlhagelela mo kitsisong ya molao le mo tsebeng e e kwa morago ya bukana e.
TSE DI SA AKAREDIWANG
Setlamo sa inšorense / moinšori se tlile go tlhagisa lenane la maemo kgotsa malwetse mo pholising a fa a ka tlholang loso lwa motho yo o akareditsweng, go ka se nneng le thuso e e tlileng go duelwa.
Dipotso tse o tshwanetseng go di botsa le tshedimosetso e o tshwanetseng go e bona mo morekising
P: Ke setlamo sefe sa inšorense se o se emelang?
K: Sesupo se tshwanetse go rebolwa ke motho yo o rekisang pholisi e bile se tshwanetse go tlhagelela mo foromong ya kopo le mo setifikeiting sa botokololo se se rebolwang.
P: Nomoro ya Pholisi ke eng?
K: E tshwanetse go tlhagelela mo foromong ya kopo le mo setifikeiting sa botokololo.
P: Ke bomang ba nka ba akaretsang mo pholising?
K: Ba ke batho ba gago ba o ba tlhophileng.
P: Ke duela bokae?
K: A, ke madi a o tlileng go a duela gape a akaretsa ditšhatšhe tsotlhe le dituelo. ditšhatšhe tse di tshwanetse go tlhagelela sentle.
P: A ke duela kgwedi le kgwedi, ka kotara kgotsa ngwaga le ngwaga?
K: O tshwanetse go tlhotlhomisa gore o duelang leng.
P: A ke duela kwa pele kgotsa ka bokhutlo jwa paka e tiro e dirilweng ka yona?
K : O tshwanetse go tlhotlhomisa fa o tshwanetse go duela kwa tshimologong ya kgwedi ( kwa pele ) kgotsa ka bokhutlo jwa kgwedi kgotsa ka bokhutlo jwa paka e tiro e dirilweng ka yona.
P: Ke tshwanetse go duela jang?
K: Ka madi a mo seatleng, ka debiti otara kgotsa ka setopo otara.
P: Fa ke duela ka madi a mo seatleng a ke amogela setlankana?
K: Ee, e tshwanetse e nne setlankana sa semmuso.
P: A dikarolotuelo tse di ka oketsega mo nakong e e tlang?
K: Dikarolotuelo di ka oketsega fa go na le ditopotuelo di le dintsi mo pholising.
P: Dikarolotuelo di netefalediwa sebaka se se kana kang?
K: Se, se tshwanetse go tlhagelela mo Pholising e Kgolo.
P: Thuso ya me e simolola leng?
K: Go ka nna le dipaka tsa tetelo mo Pholising e Kgolo.
P: Dipaka tsa tetelo ke eng?
K: Tsona di tlile go tlhagelela mo dikaelong le mo maemong a Pholisi e Kgolo.
P: Go diragala eng fa loso e le lwa kotsi?
K: Ka gale dipaka tsa tetelo ga di dire.
P: A go na le tse di sa akarediwang?
K: Tsona di tlile go tlhagelela mo dikaelong le mo maemong a Pholisi e Kgolo.
P: Go diragala eng fa ke fosa tuelo kgotsa ke emisa go duela?
K: Ga o kitla o akarediwa mme fa o simolola go duela gape, dipaka tsa tetelo le tse di sa akarediwang di ka tsenngwa mo tirisong gape.
P: Thuso e khutla leng malebana le motho mongwe le mongwe?
K: O tshwanetse go neelwa dintlha ka botlalo, segolobogolo malebana le bana ba gago.
P: A ke bona sesupo sa botokololo?
K: O tshwanetse go amogela Setifikeiti sa Botokololo le tshosobanyo ka botlalo ka ga yo o akareditsweng, madi a a tshwanetse go duela, dipaka tsotlhe tsa tetelo le tse di sa akarediwang.
P: A nka oketsa thuso ya me moragonyana?
K: Ee, o ka oketsa dithuso mo pholising ya gago fa Pholisi e Kgolo e letla, ka nako nngwe le nngwe, se, se tlile gape go oketsa dikarolotuelo tsa gago. Tse di sa akarelediwang le dipaka tsa tetelo di ka dira mo thusong e e okeditsweng.
P: Ke lopa tuelo jang malebana le loso?
K: Mokgwa wa ditopotuelo o tshwanetse go neelwa wena ka botlalo mo dikaelong le mo maemong.
P: A nka bona Pholisi e Kgolo?
K: O na le tshwanelo ya go bona Pholisi e Kgolo. Se, ka gale se diriwa fa o sa itumelele dikarabo tse o di neetsweng kgotsa o na le pelaelo mabapi le motho yo o go rekisetsang pholisi. Pholisi e Kgolo e tshwanetse go nna teng kwa kantorong ya lona e e fa gaufi ya ditirelo tsa badirisi.
P: A nka phimola pholisi ya me?
K: O ka phimola pholisi ya gago mo malatsing a le 30 morago ga go duela karolotuelo ya ntlha e bile o amogele pusetso e e feleletseng fa e le gore ga o ise o lope tuelo e e malebana le loso. Morago ga foo, pholisi e ka phimolwa nako nngwe le nngwe, fela ga go na dikarolotuelo dipe tse di tlileng go busiwa.
P: Go diragala eng fa pholisi yotlhe e sutisediwa kwa setlamong se sengwe sa inšorense / kwa moinšoring?
K: Se, se ka diriwa, fela o tshwanetse go itsisewe le go sedimosediwa ka moo e amang batho ba ba neng ba akareleditswe pele, malebana le tsotlhe tse di fa godimo. Setlamo sa inšorense se se ntšhwa / Moinšori o tshwanetse go go rebolela setifikeiti se se ntšhwa sa botokololo. Fa o ikutlwa gore ga o mo maemong a a lekaneng kgotsa a a botoka, o tshwanetse go ikgolaganya le
Setlamo sa inšorense / Moinšori wa ga jaanong ka bonako.
P: Go diragala eng fa ke na le ngongorego kgotsa potso?
K: Wena kgotsa baamogeladitshiamelo ba gago lo tshwanetse pele go lebisa potso ya lona kwa Setlamong sa inšorense / kwa Moinšoring. Fa o sa kgotsofala, o ka bega ngongorego kwa go Motlhotlhomisi ( Ombudsman ) wa Inšorense ya Paka e Telele kgotsa kwa Botong ya Ditirelo tsa Madi. ( F S B )
GAKOLOGELWA Dintlha tsa Motlhotlhomisi ( Ombudsman ) le F S B di tshwanetse go tlhagelela mo Setifikeiting sa Botokololo gape di tlhagelela kwa morago ga bukana e ya tshedimosetso.
